Atala: Musika

Mississipi diskoaren azala

Markos Untzetak (Eibar, 1970) bere hirugarren diskoa kaleratu du gaur goizean Mississippi izenburuarekin, blues, gospel eta country musikaren lurraldera egindako bidaia. Disko berria, Gaztelupeko Hotsak etxearen eskutik kaleratua, aurrerapauso handia da Markos Untzetaren ibilbidean, hain zuzen aurreko bi diskoak rock amerikarraren ildokoak baitira.

Disko hau laister izango duzue eskura Donostia Kulturako liburutegietan.

Hotsak disketxeak haurrentzako harpa metodo berria aurkeztu du Donostiako udal liburutegi zaharreko Ekitaldi aretoan. Harpa Airean argitalpenaren egilea Ane Artetxe harpa irakaslea da, ilustrazioak, berriz, Patxi Gallegorenak dira.

Ane Artetxe, Francisco Escudero Kontserbatorioko irakaslea da, eta bertako ikasleekin landu du metodo berria. Hain zuzen, ikasle talde batek kontzertu bat eskainiko du Alderdi Eder liburutegian, bihar ostirala, hilak 1, eguerdiko 12:00tan.

Argitalpena laister egongo da eskura Donostia Kulturako liburutegietan.

Aitziber Alonsoren orri markagailua

Donostia Kulturako Liburutegi Zerbitzuak aurten apirilaren 1ean ospatuko ditu apirilaren 23ko Liburuaren Nazioarteko Eguna eta hilaren 2ko Haur Liburuaren Nazioarteko Eguna.

Aurreko urteetan egin izan den moduan, egun horretatik aurrera orri markagailuak banatuko dira liburutegietan. Oraingoan Aitziber Alonso izan da marrazkilaria.

Gainera, Liburutegi Nagusiaren Haur Sailak Orixe ikastolarekin batera haurrentzako hainbat jarduera prestatu ditu: Aitziber Alonsoren ilustrazio tailerrak, Olatz Beobide eta Ramon Agirreren irakurketa saioak , Maider Galarzaren ipuin kontaketak, etab.

Alderdi Ederreko Liburutegi Nagusiari dagokionez, bi kontzertu antolatu dira. Bata, eguerdiko 12:00tan Harpa Airean taldearen eskutik, eta bestea, arratsaldeko 18:00tan Urko Menairen eskutik.

Egunari itxiera emateko Patxi Zubizarretak, Joserra Senperanak eta Thomas Canetek Joan ikuskizuna eskeiniko dute Victoria Eugeniako Club Aretoan. Sarrerako gonbidapenak Victoria Eugeniako lehiatilan jaso behar dira ikuskizunaren egun berean.

Liburuaren Eguneko egitaraua hilabete osoan zehar luzatuko da hainbat ipuin kontaketa, txontxongilo, literatur solasaldi, etaberrekin. Hilaren 28an, ostegunean, Jose Maria Guelbenzuk “El amor verdadero” azken eleberria aurkeztuko du.

Bestalde, Liburutegi Zerbitzuak arreta berezia jarri nahi izan du irakurleengan, hain zuzen, liburutegiak egunero zabaltzearen arrazoi nagusia irakurleak eta orohar bisitariak baitira.

Arrazoi horrengatik sarituko dira 2010 urtean zehar liburutegien sare osoko mailegu zerbitzuetan liburu gehien hartu dituzten 20 irakurle: 10 heldu eta 10 haur. Saritu bakoitzari Donostiako liburudendetan liburuak erosi ditzan txartel-bono bat emango zaio. Helduen kasuan, txartela 50 eurokoa izango da, eta haurren, kasuan, berriz, 30 eurokoa.

Azkenik, aipamen berezi bat Maritxu San Sebastian eta Isabel San Sebastian ahizpentzat, Latxaga zenaren arrebak. Jose Maria San Sebastian “Latxaga” (1933-2008), Donostian jaio zen, apaiz eta idazle ezaguna, duela hiru urte hil zitzaigun eta bere arrebek erabaki dute bere liburu guztiak dohaintzan eskeintzea Udal Liburutegiari.
Jaso diren 150 kaxa liburuetan hainbat altxor daude, besteak beste, Pedro Ignazio Barrutiaren (1682-1759) Acto para la Nochebuena edota Gabonetako ikuskizuna izeneko eskuizkribua.

Patxi Zubizarretak, Joserra Senperenak eta Thomas Canetek Joan errezitaldia aurkeztuko dute, apirilaren 1ean, ostiralean, Victoria Eugenia Club Aretoan (sarrera, Okendo plazatik), iluntzeko 19:30ean.

Ikuskizuna Patxi Zubizarretak berriki argitaratu duen Joan: hartzak, erlojuak eta beste pizti batzuk liburuan oinarritzen da, Joserra Senperena piano-jotzailea eta Thomas Canet argazkilariaren laguntzarekin. Sarrera mugatua izango da aretoa bete arte, eta gonbidapenak Victoria Eugenia antzokiko lehiatilan jaso behar dira ikuskizuna hasi aurretik.

Harituz Kultur Elkartea

Datorren urtarrilaren 25ean Ernest Lluch Kultur Etxeko areto nagusian Harituz Kultur Elkartearen eskutik, Gonzalo Martín (biola), Iñigo Ruiz de Gordejuela (pianoa), Unai Ruiz de Gordejuela (biolontxeloa) eta Olatz Ruiz de Gordejuelak (pianoa) osatzen duten musikari laukote honek Beethoven, Mozart eta Fauré-ren obrak interpretatuko ditu.

Hitzordua, urtarrilaren 25ean, asteartean, iluntzeko 19:30ean izango da. Sarrera dohan.

Bestalde, gogorarazten dizuegu Donostia Kulturako txartelaren jabe bazarete, Beethoven, Mozart eta Fauré-ren Cdak maileguan hartzeko aukera duzuela.

Loiola hauzoko jaiotza-Nacimiento del barrio de Loiola

Alderdi Eder Liburutegiak abenduko zerrendan Gabonetako musika eta liburu hautaketa eskaintzen dizue.

Joan den larunbatean Xabier Lete (Oiartzun, 1944), idazle, poeta eta kantaria hil zitzaigun Donostian. Bizitzan zehar hainbat poema liburu idatzi zituen eta horretaz gain kantari ezaguna izan zen. Donostia Kulturako liburutegietan Leteren liburuak eta diskak maileguan hartzeko aukera eskaintzen da. Poema liburuen artean aipagarriak dira: Egunsentiaren esku izoztuak (2008), Abestitzak eta poema kantatuak (2006), Zentzu antzaldatuen poemategia (1992), Biziaren ikurrak (1992), Urrats desbideratuak (1981) eta  Egunetik egunera orduen gurpillean (1968).

Grabazioei dagokionez berriz, 2009an Neguan izan zen errezitaldiaren DVDa argitaratu zuen Egunsentiaren esku izoztuak liburuan oinarritua. Lehenagokoak dira, besteak beste: Kantatzera noazu, Lurdes Iriondo & Xabier Lete, Lore bat zauri bat, Xabier Lete, R.M. Rilkeren “Orduen liburua”, Basarri, Lazkao Txiki, Txirrita, Xalbador, Xenpelar, Hurbil iragana, eta Antton Valverde eta Julen Lekuonarekin batera atera zuen Bertso zaharrak izenekoa.

“Neguan izan zen

oinazearen malutek

lurra zuritzen zutenean

eta elurra hilator errukitsu zenean,

orduan jaio zinen

hain maiteak zenituen hartxoriekin batera,

mihiseak hotz gelditu ziren

eta etxe bakartian zure aztarrenak

bazter guztietan, horma esankorretan

irrifarre leun haiek

eta visitas baten argazkiak,

neguan izan zen

eta espanturik gabe alde egin zenuen,

isil, zuzen, jakitun, jabe,

bizi zaitez esan zenidan

saia gauza ederrak, maitatu jendea

eta ni… ni itxaroten egonen natzaizu.

Zer naiz orain, esaidazu

fereka nazazu

zure leialtasunez hatz sotilekin,

neguan izan zen

zu aldendu zinenean,

ni ere urrun nago orain

eta bila nabilkizu goizaldeko ordu isiletan

dirudiaren guztiaren beste aldetik,

neguan izan zen.”

Xabier Lete: Egunsentiaren esku izoztuak, Pamiela, 2008. 149-150 orld.

Jon Arretxek (Basauri, 1963) “7 kolore” argitalpenaren disko-liburu bertsio berritua aurkeztu zuen atzo Donostiako Alde Zaharreko liburutegi zaharrean. Cristina Fernándezen ilustrazioak eta Francisco Ibañezek egindako musikak laguntzen dituzte Arretxek bidaien inguruan idatzitako testuak. Erein argitaletxearen eskutik kaleratu den disko-liburua laister izango duzue eskura Donostia Kulturako liburutegietan.

Hurrengo ostiralean, hilak 29, Joseba Tapiak argitaratu berri duen diskoaren aurkezpen kontzertua izango da Antiguako Lugaritz kultur etxean, Eta tira eta tumba izenekoa. Bigarren Gerra Karlista garaiko bertsoak kantu bihurtuz osatu du lana Tapiak, metal musika tresna boskote baten laguntzaz.

Kontzertua iluntzeko 21:00tan izango da eta sarrera 6€

Bestalde, Lugaritz kultur etxeko liburutegian Joseba Tapiaren diskak maileguan hartu edo bertan entzuteko aukera duzu.  Blog honen eskuinaldeko behe partean, Zuzenean atalean, liburutegien sareko katalogoaren kontsulta egin dezakezue eta Joseba Tapia lemapean Liburegietan dauden musikari honen sarrera guztien egoera ezagutzeko aukera duzue.

Urtero bezala, Donostia Kulturak Abesbatzen Astea antolatu du Tolosako CITekin lankidetzan. Gure auzoetako elizetan hainbat emanaldi  dira egunotan Tolosako nazioarteko lehiaketara etorritako taldeen eskutik. Kontzertu guztiak doakoak dira. Antiguako Ibaeta parrokian Orfej Chamber Choir esloboniarrak izango dira urriaren 25ean, iluntzeko 19:30ean.

Honen hildotik, Lugaritz liburutegian gida bat prestatu dugu fonotekan diren hainbat materialekin.

Blog honen eskuinaldeko behe partean, Zuzenean atalean, Katalogoaren kontsulta egin dezakezue, Ahotserako musika Soinu-grabazioak lemapean Donostiako Udal Liburegietan diren mota honetako diska guztien egoera ezagutzeko aukera ematen zaizue.