Liburutegiko albisteak – Donostia Kultura

Irailaren 3tik 19ra Donostiako XXV Liburu Zahar eta Aukerakoen azoka izango Gipuzkoako plazan. Bertan 40 saltzaile bilduko dira: Euskal Herria, Leon, Valentzia, Malaga eta Perutik etorritakoak.

Euskadiko Liburu Azoken Batzordeak antolatua, Eusko Jaurlaritzako Kultura Sailaren babesarekin eta Donostia Kulturaren laguntzarekin, egun osoan zehar egongo da zabalik. Goizez: 11:00-14:00 eta arratsaldez: 17:00-21:00.

Kontxako badia zoragarrian milaka lagun elkartzen dira urtero, irailako lehen bi igandeetan, Donostiako estropadak ikustera. 130 urte baino gehiago ditu ikuskizun honek; izan ere, estreinakoz 1879an egin baitzen. Aldameneko irudian ikusi daitekeenez, Novedades aldizkariak ospakizun honen berri eman zuen 1910. urtean.

Donostiako estropadei buruz gehiago jakin nahi izanez gero, Rafael Aguirre Francoren Donostiako estropadak (1879-2001) = Regatas de La Conchagomendatzen dizugu, Donostiako Udal Liburutegietan aurkituko duzun liburua .

1927an Donostiako emakume talde bat, Anbrosia Olaizolaren gidaritzapean, Errealarentzat bandera bat egiteko lanetan hasi zen. Diru bilketa bat egin zuten bertakoen artean eta brodatzaile talde bat osatu zuten, ia urte bete lanean aritu zena. 1928ko abuztuaren 30ean egin zen banderaren aurkezpena, baina tamalez lehenengo bandera hura  galdu egin zen eta argazki hau besterik ez dugu, Oier FanorenEl libro del centenario: 1909-2009liburuan argitaratua eta Donostia Kulturako liburutegietan aurkituko duzuena.

Alderdi Eder Liburutegi Nagusiko irakurleek liburuen gomendioak egin ohi dituzte  urte osoan zehar. Ondorengo dokumentuan abuztuan egin dituzten gomendioak jaso ditugu.  Guztiak Donostiako Udal Liburutegien Sareko katalogoan aurkitu daitezke.

Uztailaren 25a (Santiago Eguna) igandea egokitzen den urteari Done Jakue Urtea deitzen zaio. Mende bakoitzean hamalau Done Jakue urte izaten dira. 2010. urtea horietako bat da. Hori dela eta mundu guztitik etorritako erromesek Santiago Bidea egingo dute. Honen harira, Alderdi Ederreko Liburutegi Nagusiak gai honi buruzko liburuak bildu ditu bi zerrendetan: bat eleberriekin eta bestea ezaguerekin.

1913an Errealak Atotxako futbol zelaia inauguratu zuen ( Novedades aldizkaria, 225. zkia, 1913ko urriaren 12a). Ordura arte Ondarretan, Antigua auzoan jokatzen ziren partiduak.
Atotxako lehenengo partidua Bilboko Athletic taldearekin izan zen, eta 3 goletara berdinduta geratu ziren. Garai hartatik zelaiaren itxiera arte 1993an, partidu asko jokatu ziren . Urte hartan, abuztuaren 13an, inauguratu zen guztiok ezagutzen dugun Anoetako estadioa.

Informazio gehiago aurkituko duzu Donostia Kulturako liburutegietan dauden bi liburuetan: Txuri Urdin: Historia de la Real Sociedad eta  El libro del Centenario: Real Sociedad 1909-2009.

Betidanik ezagutu ditugu feriak gure herriko jaietan, eta noski Donostiako Aste Nagusian. Ondoko argazki honetan 50eko hamarkadan Amara auzoko, Ehunurteurrenaren plaza inguruan kokatzen ziren feriak azaltzen dira.

Blog honen eskuinaldeko zutabearen beheko aldean Flickr irakurriko duzue, eta bertan Amarako argazkiak daude ikusgai. Bide batez donostiarrak animatu nahi zaituztegu, Amara auzoko argazkiak badituzue, Ernest Lluch Kultur Etxeko (Anoeta estadioaren ondoan) Liburutegira eramateko, guztion eskura jarri ahal izan ditzagun. Modu horretan Amarako argazkien sarea sortzeko aukera izango dugu eta gure memoria historikoa berreskuratzeari lagunduko diogu.

1909ko Novedades aldizkariko argazkian, abuztuaren 14ko Salbearen irudia azaltzen zaigu, hain zuzen, Donostiako Aste Nagusiaren ohiko ekitaldia.
Internet bidez ikusgai dauden Donostiako egunkari digitalizatuetan eta udal liburutegietako hainbat liburuetan jaien inguruko informazio zehatza aurkituko duzu. Bi liburu gomendatzen dizkizugu: Javier Sadaren 125 agostos en la historia de San Sebastián eta San Sebastián : historia y anécdota de sus fiestas populares y conmemorativas hasta el año 1925 Fermín Múñoz Echabegurenek idatzia.

Datorren irailean berriro ekingo zaie Konstituzio plazako Liburutegi Zaharreko  literatur solasaldiei. Euskarazko solasaldien gidaria Iñigo Aranbarri izango da, eta gaztelaniazko saioena, berriz, Beatriz Monreal. Euskarazko programazioan  irakurriko dira: Mikel Antzaren Ospitalekoak (irailaren 27an), Kepa Altonagaren Darwin geurean (urriaren 18an), Jim Thompsonen 1.280 arima (azaroaren 22an) eta Iban Zalduaren Ipuinak -Antologia bat- (abenduaren 13an), egilearen parte hartzearekin. Gaztelaniazko solasaldietan ondorengo liburuak irakurriko dira: Khaled Hosseiniren Mil soles espléndidos, (irailaren 28an), Jhumpa Lahiriren Tierra desacostumbrada, (urriaren 26an), Anne Wiazemskyren El libro de los destinos, (azaroaren 30ean) eta Julio Cortázarren La autopista del Sur (abenduaren 14ean). Aipatutako liburu guztiak Donostiako Udal Liburutegien sareko katalogoan aurkitu daitezke. Solasaldietan parte hartzea doakoa eta irekia da.

Uztailak 31n Loiolako San Inazioren jaia ospatzen da, Gipuzkoa eta Bizkaiako zaindaria. 1910eko Novedades aldizkariko irudi honetan, Azpeitia eta Loiolako basilika agertzen zaizkigu. Gaur egun Azpeitin eta Loiolan jai handiak egiten dira eta egun honetan San Inazioren martxa abesteko ohitura dago.
San Inazioren bizitza, bere jaiotetxea, Loiolako basilika, edo beste hainbat gaietan interesatua bazaude, zatoz Donostia Kulturako liburutegietara, bertan liburu eta informazio interesgarriak aurkituko dituzu.

!Zorionak azpeitiarrei eta Loiola auzoko donostiarrei!